O Concello de Muros levou a cabo esta semana unha nova iniciativa de dinamización: unha visita guiada e comentada polo centro histórico da vila na que participou unha nutrida representación do sector hostaleiro local.
“Eliximos a noite do luns porque é un bo día para a hostalería e a resposta foi moi boa, con máis de 40 persoas na visita”, explica a alcaldesa de Muros, María Lago.
Na visita guiada, as persoas asistentes repasaron algúns dos datos históricos e culturais máis importantes do casco histórico de Muros, unha información que posteriormente poden trasladar aos seus clientes.
“Agradecemos a receptividade do sector ante esta e outras iniciativas, apoiando a aposta do Goberno local por un modelo de turismo sustentábel”, engadiu a alcaldesa, quen sinalou que a colaboración entre o Concello e a hostalería de Muros continuará nos próximos meses con diferentes iniciativas e actividades.
