Informar do impacto do proxecto de ampliación das instalacións de Escurís S.L. na contorna da Baiuca, ao abeiro da solicitude de declaración de interese autonómico formulada por JEALSA para a creación de solo que resolva as súas necesidades empresariais: este é o obxectivo da asemblea veciñal que convocan conxuntamente as concellarías do Urbanismo e do Medio Ambiente da Pobra do Caramiñal para martes, 23 de abril, ás 20.00 horas, no Auditorio do Museo Valle-Inclán.
O edil titular destas áreas, Xosé Lois Piñeiro, esgrime que se organiza esta xuntanza para que a cidadanía, especialmente a residente na contorna da factoría, coñeza polo miúdo a iniciativa empresarial e a repercusión desta no aspecto urbanístico e medioambiental. A solicitude da compañía xa recibiu os informes favorables pola parte do Instituto Galego de Promoción Económica (IGAPE) e da Dirección Xeral de Ordenación do Territorio e Urbanismo (DXOTU) con relación á súa petición e, agora, a institución autonómica abre un prazo de 2 meses para que o Concello se pronuncie ao respecto, de consideralo oportuno.
Durante a reunión veciñal darase tamén conta dos informes técnicos emitidos pola Administración local con relación a isto. Preténdese, polo tanto, recolle-la percepción da sociedade e as propostas sobre o proxecto empresarial para incorporalas ás alegacións que, segundo confirma Piñeiro, presentará o Concello.
