O tenente alcalde e concelleiro de cultura, Anxo Núñez Fernández, presentou na mañá deste venres 5 de abril a 24ª edición do Festival do Pampallín en Outes, unha convocatoria na que o Concello aposta firme pola música ao vivo, profesional e en galego. En base a isto, o cartel contará con “tres grupos potentes e de actualidade no panorama musical galego”, que encherán o vindeiro 30 de abril, véspera de festivo, o escenario do festival na praza de Galicia con sons de electro-pop, electro tradicional, rock, indie e garaxe, sinalou o concelleiro. Trátase de Mondra, presentando Folía das Ardentes, os esteiráns The Rapants (A máquina do bo rollo) e Lontreira (Apnea).
Anxo Núñez fixo tamén fincapé na “aposta do Concello pola recuperación da tradición vencellada ao Pampallín que vai da man cos maios celebrados en toda Galicia e Europa para a bendición dos labores agrícolas a través de ritos ancestrais”. No caso do territorio outense, sinalou, “isto materializábase na festividade do Pampallín no que a mocidade local xuntábase nas agras ao anoitecer para percorrer cun facho de palla ardendo os cultivos e chamar por unha colleita próspera e abundante”.
Seguindo este fío, a edición 24 da festa incluirá a celebración dun rito do lume no primeiro descanso da noite. Nas vindeiras datas anunciarase tamén, con máis detalle, un obradoiro para a preparación do mesmo e as diferentes colaboracións con entidades locais: Terra de Outes, CEIP Outes, IES Poeta Añón, ADISBISMUR e Protección Civil. O edil engadiu que dende o Concello valórase positivamente a liña de axudas para festivais que presta a Deputación da Coruña e que se solicitou para o desenvolvemento do Pampallín.
O 30 de abril comporase do Pampallín Miúdo a partires das 17:00 con inchábeis, xogos tradicionais e música para os máis cativos e coa noite grande a partires das 22:00 que comezará da man da ruada de Latexo Percusión e continuará cos tres concertos devanditos de Mondra, The Rapants e Lontreira.
O concelleiro de Cultura fixo un chamamento a toda a veciñanza do concello de Outes, da ría e a todos os galegos e galegas a achegárense ao que será, dixo, “o evento musical do ano en Outes e unha noite para recordar”.
