A Casa da Cultura de Boiro acolle este 3 de maio a estrea na nosa comarca de deseXo, unha peza para público adulto a cargo de Talía Teatro. Será ás 21.00 horas deste venres.
A función lanzaralle ao público a seguinte listaxe de preguntas: Como foi a nosa educación sexual? Estamos preparados para ter unha sexualidade sa? Sabemos como afrontar as nosas relacións? Somos capaces de educar ás próximas xeracións? Onde aprendemos o que sabemos sobre sexo? Na pornografía? Nas redes sociais? E que consecuencias ten formarse así?
deseXo é unha comedia na que seguiremos a varios personaxes a través das súas publicacións nas redes, vendo como afrontan a súa día a día, as súas relacións, os seus desexos e os seus medos.
É unha obra sobre a pornografía, tanto real como social; unha reflexión cómica sobre un mundo que vai cada vez máis rápido, onde aprendemos en liña, e onde todo, absolutamente todo, está exposto.
Ficha artística
Autor: Diego Rey
Dirección: Diego Rey
Elenco: Marta Ríos e Dani Trillo
