Vai anos formulaba dende as páxinas dun xornal galego no que colaborei varios anos o enorme beneficio que suporía para a comarca do Barbanza dispoñer dun enlace ferroviario con Padrón conectando esta cidade -e á súa vez con Vigo e Santiago, A Coruña e Ferrol- con Noia, Ribeira, A Pobra, Boiro e Rianxo.
Un soño?. Pois xa non o é tanto: a seis quilómetros ao norte de Padrón, na Escravitude, RENFE cumpre en parte esta arela que xa se barallou en tempos da ditadura de Primo de Rivera e na II República, proxecto que nunca callou.
Dende o 18 de abril de 2015 (confeso o meu descoñecemento ata hoxe de tal feito) presta servizo de viaxeiros a estación Padrón-Barbanza que da servizo a Padrón e, teoricamente, á comarca do Barbanza como centro da nova liña de alta velocidade Vigo-A Coruña no marco do Eixo Atlántico que conectará a fronteira hispano-portuguesa con Ferrol. É unha liña, como se sabe xa electrificada a 25 KV 50 Kz CA con data do 29 de marzo de 2015. A estación Padrón-Barbanza ten dous andéns ou plataformas e catro vías propiedade do ADIF e operadas por RENFE. Efectúan paradas aquí varios servizos de media distancia de RENFE que circulan con destino ás estacións de Vigo-Urzáiz ou A Coruña, con paradas en Redondela AV, Arcade, Pontevedra, Vilagarcía de Arousa, Santiago de Compostela e Cerceda-Meirama.
Ben sei que o feito da denominación Barbanza (xunguida á de Padrón) non ten, hoxe en día, maior significación. Máis soñar é libre, e como teño moi presente aquel antigo traballo xornalístico, deixo voar a ilusión e quero crer que RENFE e ADIF poden, o día de mañá (non lonxano) dar un paso nesta dirección.
A vía, electrificada aparentemente, supera -tamén en aparencia e vista dende a autovía do Barbanza en dirección Padrón-Ribeira- os límites do concello de Dodro. De pretender circundar dende aquí a área no bordo Rianxo-Boiro-A Pobra-Ribeira-Noia-Padrón (sen dúbida custoso plan, pero social e economicamente rendible a medio e longo prazo) o pulo para esta comarca sería decisivo.
Xa séi que é falar por non estarmos calados, que o falar non ten cancelas e todos eses ditos tradicionais; pero soños tan ou máis imposibles ca este se fixeron realidade. E falar da comarca do Barbanza non é ningunha gaita desafinada.
Un ex alcalde “popular” de Ribeira -supostamente ben coñecedor da súa terra e comarca- é na actualidade senador do seu partido, o PP. O senador Ruíz ben podería darlle unha volta a este asunto, a esta que seguramente cualificará de “historia”. Pero unha iniciativa deste calibre -que xa nin sequera estará gardada no máis esquecido curruncho dun caixón do que ninguén sabe nada- presentada nas instancias axeitadas daría pé, cando menos, a que se fale do vello plan na Cámara Alta, que é a de representación das comunidades autónomas.
Senador Ruiz: outros presentaron a iniciativa vai un século. E, coma sen querelo, naceu o ferrocarril de vía estreita do Cantábrico: velaí a de Ferrol-Xixón, por exemplo. Ou o euskaltren.
Se daquela puideron, non imos poder facelo os galegos de hoxe en día?.
Non inventa nada novo. Só actualizaría un soño dos nosos devanceiros.
…
