En Outes gran participación no obradoiro de Pampallíns

20 Abril 2024

O concello de Outes celebrou o obradoiro de Pampallíns co obxectivo de poñer en valor e recuperar a tradición.

No obradoiro participaron máis dunha ducia de voluntarias para preparar xuntas os Pampallíns tradicionais que farán o seu debut na noite do 30 de abril. Ademais das persoas que se inscribiron no obradoiro, contamos coa colaboración de ADISBISMUR e a Asociación Cívico-Cultural Terra de Outes. Ditas asociacións axudaron na obtención da palla e no desenvolvemento do obradoiro.

No obradoiro contamos cunha pequena exposición e resume do traballo desenvolto polo alumnado do IES Poeta Añón que nos axudou a obter máis información de primeira man dos maiores de Outes para saber como facían antigamente os fachuzos do Pampallín: que formas buscaban, que materiais empregaban, que técnicas aplicaban e como desfilaban con eles.

Fíxose tamén un coloquio sobre as orixes desta tradición e a relación co mundo agrario e como sobreviviu durante séculos evitando a censura clerical e convertíndose nun día de liberación para a xuventude Outense dende hai moitas xeracións.

A través da tradición do rito do Pampallín pedíase abundancia e fertilidade no agro co lume como elemento central. O Pampallín é unha variante propia do noso concello que vivimos de xeito análogo coas celebracións europeas dos maios.

Pampallín, Pampallán
Aluméame o meu pan
Espigas coma carballos
E grans coma bugallos
Aí vén o trigo
Aí vén o pan

Este obradoiro conclúe os últimos preparativos de cara á gran noite da 24ª Edición do festival do Pampallín que terá lugar o vindeiro martes 30 de abril, véspera de festivo, na Praza de Galicia da Serra de Outes. Na noite farán debut os Pampallíns prendidos a través dun rito do lume e veciños e visitantes desfrutarán dunha programación musical de grandísima calidade da man dos grupos: Mondra, The Rapants, Lontreira e Latexo Percusión. Os máis cativos contarán co seu propio Pampallín Miúdo a partir das 17:00 da tarde na Horta do Muíño.

Outros artigos

Domingo regresa o sol e empeza a subir a temperatura

Na xornada do domingo seguiremos con aire frío en altura xerando inestabilidade atmosférica. Unha situación que favorecerá a formación de chuvascos, localmente treboentos, máis probables e frecuentes no interior e nas horas centrais do día. As temperaturas mínimas...

+

Ribeira pon en valor o traballo das mulleres no mar

O Concello de Ribeira conmemorou o Día Internacional da Muller no Sector Marítimo rendendo unha homenaxe a tres mulleres extraordinarias que dedicaron as súas vidas a unha profesión fundamental para a nosa comunidade: o marisqueo. O concelleiro de Mar, Fernando...

+

Publicidade

Revista en papel

Opinión

“Día das Letras Galegas 2025”. Manuel Dominguez

“Día das Letras Galegas 2025”. Manuel Dominguez

Andrés do Barro, cantante, compositor de soul galego, grandes éxitos dende 1975 onde as linguas do Estado foron confinadas, censuradas, ata acadar o primeiro posto nas listas dos discos máis vendidos en España tres veces seguidas: primeiro en 1969 con O trem , logo en...