O deputado do BNG no Congreso, Néstor Rego, vén de rexistrar iniciativas para que o MITECO, a través da Demarcación de Costas, tome medidas que permitan reducir o risco na seguranza para as persoas despois de varios desprendementos e corrementos de terra, “un perigo que pode verse incrementado despois da tala de árbores na zona”, sinalou, ao mesmo tempo que demandou a Transición Ecolóxica “deseñar un proxecto integral para a recuperación dos cantís de Tanxil – Pena Vixía – Tronco dotado dos recursos necesarios para evitar novos derrubamentos”.
Segundo lembrou, o Ministerio de Transición Ecolóxica decidiu recentemente, levar a cabo unha tala de árbores en Tanxil, “unha intervención que pode agravar a situación e provocar novos desprendementos de terras e pedras, como os que xa se teñen producido e que ocuparon o paseo marítimo en distintos puntos”. Este risco, de feito, supuxo a necesidade de cortar o acceso ao tráfico e ás persoas viandantes en puntos de Tronco, recordou, engadindo que o Goberno do Estado e concretamente o MITECO, a través da Demarcación de Costas, “debe levar a cabo actuacións que permitan consolidar o terreo e evitar os derrubamentos que aínda a día de hoxe seguen a pór en risco a seguranza das persoas”.
“A actuación nesta área”, sinalou o deputado do BNG, “é cada vez máis urxente e necesaria”.
En opinión do deputado nacionalista, o Goberno debe atender as demandas da veciñanza e “adoptar á maior brevidade” as accións necesarias para evitar riscos para as persoas e lograr a recuperación desta área da costa. “A Demarcación de Costas debe deseñar un proxecto integral de recuperación dos cantís de Tanxil e Tronco, dotado dos recursos necesarios, ademais de facer un adecuado seguimento e inspección deste tramo mentres non se levan adiante as accións de recuperación e consolidación, especialmente onde se produciu a tala de árbores que, en principio, axudaban a soster o terreo e evitar así novos derrubamentos”, aseverou Rego.
