O Concello da Pobra do Caramiñal convoca unha nova xornada de limpeza de areais que se concentrará na Corna. Será este domingo 21, en horario de 16.00 a 20.00 horas.
Nesta liña, o concelleiro do Medio Ambiente, Xosé Lois Piñeiro, explica que se continúa así na senda de implicar a cidadanía no coidado da natureza, nesta ocasión, no litoral cunha acción de retirada de lixo. Engade que, a Administración local, con este tipo de iniciativas, está a dar continuidade ás actividades de concienciación; unha mostra máis do compromiso en materia medioambiental.
As persoas voluntarias recibirán o material necesario para a retirada manual de elementos nocivos para o ecosistema e contarase tamén coa colaboración da Protección Civil.
Poderán participar todas aquelas persoas maiores de idade que se inscriban no enderezo electrónico voluntariadopobradocaraminal@gmail.com. A data límite é no xoves 18 para a formalización do trámite.
