O vicepresidente da Deputación, Xosé Regueira, e a deputada de cultura, Natividade González, acudiron ao Concello de Ribeira, onde se reuniron co alcalde, Luís Pérez Barral, o segundo tenente de alcalde, Francisco Suárez-Puerta, e a concelleira de Economía e Facenda, Herminia Pouso, para abordar posíbeis vías de colaboración de cara á inauguración do novo Auditorio Municipal, prevista para o vindeiro 15 de xuño. Ademais, aproveitaron para visitar o Museo do Gravado.
Dende a Deputación valoraranse diferentes posibilidades para colaborar na programación especial da apertura deste “equipamento cultural de referencia comarcal”, tal e como sinalan dende o Consistorio.
Na xuntanza abordáronse tamén as diferentes liñas de colaboración que permitan ao Concello de Ribeira acceder aos fondos dispoñíbeis a través da Deputación.
A deputada de Cultura mostrou “toda a disposición” da súa área para “contribuír a dotar de vida a este espazo con gran potencial para a difusión da nosa cultura”, revelou, “nun fito tan relevante como é a súa inauguración”. Tal e como sinalou, “auditorios como este son o mellor escaparate da nosa identidade, e representan unha excelente oportunidade para promocionar a nosa cultura e para dinamizar a comarca, a provincia e o país”.
