No marco da celebración do Día Internacional da Muller (este venres 8 de marzo), o Concello de Porto do Son vai impulsar un curso gratuíto sobre Muller e saúde. Celebrarase o vindeiro 9 de abril no Club de Xubilados de Porto do Son, en horario de 16:30 a 20:30 horas. A persoa encargada de impartilo será a Paula Sánchez Flores, matrona do Complexo Hospitalario da Coruña, o CHUAC. O curso, programado pola formadora Begoña García Cepeda, vén da man da Escola Galega de Saúde, a axencia ACIS de coñecemento en saúde e o Concello de Porto do Son. As inscricións cómpre facelas na Área de Servizos Sociais do Consistorio sonense entre o 4 e o 22 de marzo, a través da conta de correo maria.santos.lemina@portodoson.gal.
Os obxectivos do curso son mellorar a información e a comprensión dos cambios evolutivos na muller e axudar a previr enfermidades propias do colectivo feminino.
Tocaranse cuestións como a menopausa e a osteoporose, a prevención xinecolóxica, os factores de risco, recursos de fisioterapia e beneficios dunha alimentación saudábel e do exercicio.
