Con 230 metros de eslora, desde este mércores pola mañá, permanece no porto exterior de Punta Langosteira (Arteixo) o primeiro buque graneleiro do mundo que navega con propulsión eólica. Para esta fin utiliza velas ríxidas de 37 metros de altura, o que lle permite aforrar un 30% de combustible e reducir notablemente a pegada de carbono. O buque Pyxis Ocean chegou ao Porto Exterior da Coruña procedente de Brasil cunha carga de cereais e, após unha primeira escala en Marín, procede agora a descargar en Punta Langosteira 10.500 toneladas de soia. Hoxe mesmo, rematada a descarga, porá rumbo ao porto holandés de Amsterdam.
Esta escala tan especial fixo que se deran cita no devandito porto exterior diversas autoridades da Xunta, da Autoridade Portuaria, operadoras e o concello coruñés de Arteixo, que se felicitaron polo feito de que Langosteira sexa neste momento a primeira dársena de Galicia en volume de mercadorías, e o primeiro porto da cornixa cantábrica en movemento de cereais, polo que se converteu xa nunha infraestrutura clave para o sector primario galego, xa que logo dende Langosteira se abastece da materia prima necesaria para alimentar ao gando e aves de Galicia, oeste de Asturias e norte de Portugal e Castela-León.
A Autoridade Portuaria da Coruña, aposta firmemente pola descarbonización e a redución de emisións, como se evidencia na construción destes novos buques fretados pola multinacional estadounidense de agroindustria Cargill, que traballa conxuntamente co Grupo Nogar, unha empresa familiar galega en terceira xeración, líder no movemento de cereais no mesmo porto no que da culmen á súa terminal automatizada de graneis sólidos, que xa é a maior da Península Ibérica e unha das maiores de Europa, con delegación na Coruña e un investimento propio superior aos 50 millóns de euros.
