Optimizar o funcionamento do Mercado Municipal da Pobra para que “se converta nun punto de referencia no sector da alimentación”. Esta é a razón pola que a Concellaría da Promoción Económica vén de lanzar unha enquisa participativa a este respecto integrada por un total de once preguntas que aporten información de interese para que a Administración local acade a súa finalidade. Aquí, a cidadanía poderá facer unha valoración e sinalar os servizos que bota en falta.
A concelleira da Promoción Económica, Amparo Cerecedo, xunto coa técnica municipal desta área, Sara Sánchez, manifestou este mércores 6 de marzo que “os datos tamén servirán para executar accións focalizadas na dinamización económica e no incentivo das compras do comercio de proximidade, ademais de coñecer os perfís da clientela e persoas non compradoras”.
As enquisas poderanse cubrir e depositar ata o mércores da vindeira semana na propia praza de abastos e en establecementos comerciais e hostaleiros. Tamén se pode cumprimentar de maneira telemática mediante o código QR do stand situado no mercado ou na ligazón habilitada polo Concello.
