José Francisco Domínguez Torres e Cristina Pose Davila foron finalmente os gañadores das accións impulsadas polas concellarías da Cultura e da Mocidade da Pobra do Caramiñal para celebrar o Día de San Valentín, no 14 de febreiro: un concurso de cartas de amor e un sorteo fotográfico.
Unha vez o xurado avaliou as misivas presentadas e emitiu o seu ditade, a concelleira da Cultura, Patricia Lojo, e o seu homólogo da Mocidade, Eloy Sobrido, fixeron entrega dos premios.
A recompensa da noite nunha casa rural e unha cea para dúas persoas dotada na categoría adulta do certame epistolar foi parar a José Francisco Domínguez Torres. Nesta modalidade rexistráronse unha quincena de cartas das que o xurado avaliou aquelas que cumprían coas bases reguladoras e conforme os criterios de orixinalidade, calidade literaria, estética na composición e na expresión, e maila variedade léxica e expresiva, así como a coherencia co tema exposto. O tribunal vencellado ao ámbito do xornalismo e da literatura ditaminou, polo tanto, que a distinción recaese en Carta para Ada.
Pola contra, a categoría xuvenil quedou deserta ao non cumprir as bases as cartas recibidas, se ben esta constaba dun iPhone como premio.
Tamén houbo o sorteo fotográfico do banco do amor habilitado no parque do Castelo. Entre as máis de corenta imaxes compartidas no apartado de historias do Instagram mencionando a conta @gobernodapobra e cos cancelos (hashtag) #temoslio e #concellodapobradocaramiñal, resultou agraciada a instantánea publicada por Cristina Pose Davila, quen poderá desfrutar dunha cea para dúas persoas.
