A mostra fotográfica EspadELA da fotógrafa e escritora boirense Charo Lópes recolle fotos de dous colectivos barbanzáns e que son A Unión de Muchachas e Comoxo Organics. A inauguración da mostra, na que participará a concelleira de Cultura, María Outeiral, terá lugar este sábado ás 12.00 horas no Centro Social de Boiro con sesión vermú e foliada.
Esta exposición é una iniciativa da cooperativa Arabías que conta co financiamento da Deputación da Coruña e na que se reflicten os corpos, as voces e as palabras de 58 mulleres mediante un proceso de construción colectiva. As imaxes buscan expresar as múltiples realidades que habitan nos contextos rurais galegos a partir dunha ollada feminista.
Nas máis de 40 imaxes que compoñen a proposta fotográfica participaron 58 mulleres de Boiro e tamén de Laraño, Arzúa, Touro, Carballo, Brión, Frades, Cerceda, Oroso ou Ames que dan corpo aos retratos colectivos e individuais.
EspadELA xurdiu no ano 2018 para crear espazos de traballo colectivo, impulsada por Arabías da man do Sindicato Labrego Galego e financiada pola Deputación da Coruña.