O BNG anunciou este 21 de marzo unha “ofensiva institucional” contra o proxecto da portuguesa Altri na Ulloa e anunciou que apoiará a mobilización veciñal para impedir que se materialice a iniciativa en Palas de Rei, unha “auténtica bomba ambiental no corazón de Galiza que causará un enorme prexuízo ambiental e socioeconómico en toda a comarca da Ulloa, chegando o seu dano até a ría de Arousa”, sinalou a viceportavoz do BNG no Parlamento, Olalla Rodil, quen dixo que o PP “minte en relación ao proxecto”, porque, dixo “non ten nada que ver co que se anunciou, posto que o que pretende instalar Altri en Palas de Rei non é unha factoría de fibras téxtiles, senón unha gran fábrica de celulosa líquida tres veces máis grande que a de ENCE en Pontevedra”.
“Segundo recoñeceu a propia empresa”, subliñou Rodil,” a fábrica proxectada produciría 250.000 toneladas de celulosa e 60.000 de lyocell nunha primeira fase, cantidades que ascenderían a 400.000 t. e 200.000 t. respectivamente coa factoría a pleno rendemento”.
E engadiu: “Pretenden instalar en Galiza unha fábrica contaminante que non queren en Portugal, que xeraría un enorme impacto territorial, nos recursos hídricos e no tecido socieconómico” non só en Palas de Rei, senón tamén en Agolada, Santiso e Melide e na contorna da ría de Arousa.
“É unha agresión descomunal e un ataque ao ben máis preciado que temos”, apuntou en alusión a auga que precisaría a pasteira que, segundo a propia empresa, captaría máis de 16 millóns de metros cúbicos ao ano procedentes do encoro de Portodemouros. É dicir, 46.000 metros cúbicos de auga ao día ou, o que é o mesmo, 535 litros por segundo. “Altri succionará máis auga da que consumimos nun día as 350.000 persoas que vivimos na provincia de Lugo”, destacou Olalla Rodil.
A celulosa vertería de volta ao río Ulla aproximadamente o 80 % da auga logo de sometela a procesos industriais contaminantes e de depuración industrial, explicou a deputada nacionalista, salientando que “o Ulla xa ten agora uns índices elevados de contaminación e que desemboca nunha ría de Arousa da que comen máis de 4.000 familias, que produce máis do 70 % do mexillón de Galiza e que leva anos vendo caer a súa produtividade”.
Rodil destacou, por outra banda, o impacto económico que a fábrica terá na zona na que se enmarca a DOP Arzúa-Ulloa, a segunda en produción do Estado español, con numerosas explotacións agrogandeiras e proxectos empresariais vinculados ao sector primario ou ao Camiño que xeran riqueza e postos de traballo na zona.
