A sede da Fundación Laxeiro (Vigo) acole o vindeiro martes 19 de marzo a inauguración dunha mostra comisariada por Xoán Pastor Rodríguez, director do Museo de Artes do Gravado á Estampa Dixital, e por Xosé Carlos López Bernárdez, escritor vigués e historiador da Arte.
Trátase da exposición Colmeiro, punta seca, unha colaboración coa Fundación Museo de Artes do Gravado á Estampa Dixital de Ribeira que editou esta carpeta don 48 gravados do artista galego datados a finais dos anos trinta e os anos corenta. Grazas á cortesía da familia Colmeiro, estes traballos móstranse xunto ás súas matrices orixinais, o que, segundo nos avanza o propio Pastor, “ofrece unha oportunidade única para entender o proceso de estampado de obra gráfica”. Na presentación-inauguración intervirán Xosé Carlos L. Bernárdez, Luís Pérez Barral, alcalde de Ribeira e presidente da Fundación Museo de Artes do Gravado á Estampa Dixital, e Abel Caballero, presidente da Fundación Laxeiro e alcalde de Vigo. A exposición será inaugurada ás 19.30h.
Agradecendo a túa colaboración e agardando poder saudarte persoalmente, recibe un cordial saúdo.
