Este sábado 16 de marzo a partir das 8 da tarde celebrarase unha nova edición da Gala Solidaria anual da Asociación Contra o Cancro de Ribeira, que terá novamente o obxectivo de recadar fondos para a investigación da enfermidade. Segundo explicou a súa presidenta “a xunta provincial da Coruña repartirá os máis de 800.000 euros que se recadaron en fondos de investigación contra o cancro”. O evento celebrarase no salón Chicolino (Boiro).
Este ano, a xunta local da Asociación Española contra o Cancro outorgará recoñecementos a Manolo Mirás, pola súa implicación coa veciñanza de Ribeira e a posta en marcha de Cáritas Ribeira; ao colectivo Mimarte, pola súa implicación e solidariedade coa xunta local de Ribeira e outras institucións comarcais que prestan servizos á terceira idade; a Miguel Fernández, médico oncólogo, polo seu labor na investigación no ámbito das doenzas oncolóxicas; e finalmente, ao colectivo de enfermería do Hospital do Barbanza, pola súa implicación durante a COVID e as posteriores campañas de vacinación.
O concelleiro de Servizos Sociais, Vicente Mariño e a presidenta da Asociación Contra o Cancro de Ribeira, María José Carreira, presentaron o acto e concelleiro, destacou a importancia da prevención e investigación contra o cancro e agradeceu á xunta local o seu traballo e os seus esforzos na loita contra esta enfermidade.
