O Concello de Muros presentou este venres a súa programación do venres 8 de marzo, Día Internacional da Muller, con diferentes actividades de concienciación para todas as idades. A alcaldesa, María Lago, comentou no acto cos medios de comunicación que “a desigualdade é un problema estrutural que esixe unha resposta social forte”, polo que mostrou a súa confianza en que as actividades previstas sirvan “para reflexionar e seguir avanzando para acadar o obxectivo dunha igualdade real e efectiva”. Lago lanzou un convite a veciñanza “a participar nas actividades para conmemorar esta data tan sinalada e importante, para seguir loitando pola igualdade e construír deste xeito unha sociedade mellor”.
A alcaldesa presentou a programación xunto á concelleira de Igualdade de Muros, Maruxa Martínez, e Julia Quinteiro, directora do CIM (Centro de Información á Muller). Martínez destacou a importancia de conmemorar este día “para recoñecer tanto os avances feitos ata o momento en materia de igualdade de xénero e feminismo como para reivindicar os que aínda están por facer”.
A programación comezará con dúas sesións de contacontos os días 5 e 6 de marzo, para dar paso o xoves 7 a un coloquio sobre coidados e autocoñecemento feminino.
O propio 8 de marzo celebrarase unha concentración e lectura de manifesto por parte dos centros educativos e unha visita guiada sobre‘O papel da muller polo conxunto histórico e o Museo do Mar.
Ata o día 22 de marzo seguirán as actividades por todo o municipio muradán. Ademais, no pleno deste venres aprobouse por unanimidade unha Declaración Institucional polo Día da Muller.
Reproducimos aquí o cartaz completo das actividades:
