Tucho díxolle á súa neta: lévame ao Faro de Corrubedo. Creo que foi unha das últimas viaxes ou excursións que fixo, era un home de Ribeira, da súa terra, pero tamén un algo viaxeiro e con interese por coñecer outros lugares. En Corrubedo, era un bonito día de sol, sacáronlle unha foto, esta que reproducimos aquí, co faro ao fondo, símbolo da resistencia ante os embates do mar e do vento, igual que Tucho, home rexo e correúdo, tiveron que vir moitas insuficiencias e moitos problemas de saúde todos xuntos e ao mesmo tempo para acabar con el.
Este venres o sol tamén acompañou o seu enterro, un pequeno respiro entre tantos días de choiva, as nubes tiveron con Tucho e coa súa familia o detalle de apartarse. Na foto de Corrubedo as poucas nubes que vemos no ceo parecen ter présa tamén para quitarse do medio.
Antonio Sieira Vidal, Tucho Charlín, deixa un oco ben grande entre quen o quixo e o apreciou. Este baleiro faise aínda máis grande ao tratarse Tucho dun home, como dicía o poeta Machado, bo no bo sentido da palabra. As fotos que acompañaron a despedida no velorio e que rexistran diferentes momentos da súa vida, son importantes non só por Tucho, senón tamén pola xente que o acompaña, principalmente familiares (fillos, netos), e pola felicidade inequívoca que irradian polo simple feito de estar na súa compañía.
Tucho era un resistente, cousa que quedou referendada no último treito da súa vida. Unha resistencia firme e sen alardes. Este temperamento reflectiuse tamén na súa vida como empresario, á fronte da Panadaría Charlín, un negocio que debera aparecer en todos os libros da historia da comarca como modelo de éxito baseado na tradición. Dicir que xa non quedan moitos negocios como Charlín pode parecer esaxerado, pero non o é. Así se facían as cousas hai máis de cen anos (con forno de leña e fariñas do país) e así se seguen a facer, a pesar do moito que cambiou todo e da presión low cost da competencia. Foi e segue sendo un segredo a voces: a fórmula do bo trato e da calidade no produto aínda funciona e aquí o tendes, en Ribeira, nas Carolinas.
Tucho marchou este xoves pola tarde e o venres 15 de marzo enterrárono. Tiña 90 anos. Detrás de si deixa décadas de traballo (primeiro nos Talleres Nervión, logo na Panadería Sieira Charlín fundada pola súa nai, á fronte dun dos fornos máis antigos da comarca: outro exemplo de resistencia) e unhas cantas ideas de valor sobre como vivir, como tratar aos demais e como despedirse. Non haberá máis fotos del no Faro de Corrubedo pero o espírito, como dicía a canción, permanece.
