Novo caso de violencia de xénero en Galicia, desta volta na nosa comarca. Unha muller de 25 anos, Andrea M.T.T, foi asasinada presuntamente pola súa ex-parella J. P.este martes 19 de marzo pola tarde, no seu domicilio da rúa Doutor Torres de Pameira (Ribeira), onde convivía co seu asasino. Ao parecer, a muller foi atacada cunha arma branca. O home tentou suicidarse logo de acabar coa vida da súa parella. Investígase como crime machista. O presunto asasino atópase no Hospital do Barbanza en estado crítico.
O suceso foi comunicado ao 112 por un particular, que mostrou a súa preocupación polos berros escoitados nunha vivenda da devandita rúa de Palmeira.
Tratouse dun apuñalamento cun coitelo de cociña afiado, e os axentes da Policía Xudicial xa o atoparon. Foi con esta mesma arma coa que logo tentou quitarse a vida o suposto agresor, xa que na zona había abundante sangue procedente das feridas que se autoinflingió. O home chamou ao 112 alertando do que fixera e da súa intención de acabar coa súa vida.
Os feitos foron comunicados logo á Policía Nacional, Policía Local, Bombeiros de Ribeira e 061. A muller xa falecera cando os efectivos de emerxencias entran no domicilio.
Segundo puidemos saber, a parella tiña un fillo pequeno de dous anos que non estaba no domicilio este martes pola tarde, cando sucederon os feitos.
O alcalde de Ribeira, Luís Pérez Barral, compareceu tamén no lugar, onde condenou os feitos e confirmou que a vítima tiña 25 anos e que estaba separada da súa parella. Explicou que o suceso ocorreu sobre as cinco da tarde e que o suposto agresor utilizou unha arma branca. Tiñan un neno de 2 anos, que no momento do asasinato non se atopaba na casa e que agora está a ser atendido polos familiares. Pérez Barral anunciou que este mércores celebrarase un pleno extraordinario urxente e un minuto de silencio para condenar o crime, ademais de decretar loito.
O presidente da Xunta en funcións, Alfonso Rueda, condenou o crime e enviou o seu “apoio e agarimo” á familia da vítima.
“Estremecémonos cada vez que recibimos unha noticia coma esta. Un novo asasinato machista deixa á sociedade galega e á vila de Ribeira sen palabras”, escribiu Rueda na súa conta na rede social X esta tarde.
Enviou ademais o seu “apoio e agarimo á familia e aos seres queridos de Andrea. #NinUnhaMenos”, conclúe a mensaxe.
A corporación municipal expresa o seu rexeitamento ante o asesinato acontecido no municipio.
