Por sorte, ningunha persoa resultou afectada neste lume que se produciu nunha vivenda da rúa do Porto Novo.
O alertador, que contactou co 112 Galicia cinco minutos despois das 21:30 horas, era un dos ocupantes do inmoble afectado. Durante a chamada indicou que o lume puido comezar nunha estufa e que tanto el como o resto de persoas que estaban no interior abandonaran a vivenda ilesos.
Os xestores do 112 Galicia informaron aos Bombeiros de Ribeira e Boiro, ao Grupo de Atención ás Emerxencias Municipal (GAEM), á Policía Nacional e Local e aos voluntarios da Agrupación de Voluntarios de Protección Civil ribeirense.
Pasadas as 22:45 horas, os equipos de extinción deron por controlado o lume e procederon coas tarefas de ventilación. A continuación, comunicaron os danos materiais rexistrados: ardeu por completo a planta baixa, na que había almacenados mobles e diversos colchóns.
