Todo fai cavilar na posibilidade de que o pesqueiro de Marín “Villa de Pitanxo” non dispuxera das condicións mínimas de habitabilidade, entre outras anomalías que puideran non facer moi agradable a vida a bordo. Non levou a cabo, supostamente, exercicios que se entenden como indispensables para a seguridade a bordo e outros, como os de abandono de buque, máis que esixidos polas autoridades e agora reclamados por antigos compañeiros e familiares dos tripulantes mortos no afundimento en Terranova do barco de Marín.
Algúns dos certificados esixidos após as reformas ás que foi sometido o barco estaban caducados, informan fontes competentes a O Barbanza; a lista de tripulantes ou rol podería ser asimesmo irregular e foi cerrada días antes do afundimento; non se sabe onde fixo a revisión previa á saída e se podía garantir debidamente a estadía a bordo dos tripulantes. Houbo problemas co COVID, motivo polo que se procedeu a habilitar o pañol -como se citaba anteriormente- para acoller as colchonetas nas que os afectados -nove polo menos- trataban de se recuperar da pandemia.
No que atinxe ao devandito “embarre”, moitas e variadas son as opinións ao respecto. Para un veterano capitán, consultado por este xornal, “embarrar é doado, mais non está nada claro que tal embarre se producira. Sobre todo polas características específicas da zona no que o “Villa de Pitanxo” faenaba cando se produciu o naufraxio. Se houbera embarre compre falar de serias dificultades sobrevidas e sempre manobras arriscadas”.
Algúns datos relacionados con este feito podería facilitalos a caixa azul, que determinaría os movementos efectuados polo buque. Tamén o sistema AIS ten moito que dicir a este respecto, pola súa función de control do buque debido a que, como é sabido, marca cada poucos minutos a posición, rumbo e velocidade do barco, determinantes para sinalar con case que total exactitude se o “Villa de Pitanxo” embarrou ou non. Estímase que a velocidade dos peixes, entre 3 e 3,5 nós sería, aproximadamente, a que desenvolvera o pesqueiro adaptándose deste xeito para realizar sen problemas as faenas de pesca.
