O Concello da Pobra do Caramiñal promove este mes de febreiro unha nova xornada de retirada de lixo dos areais da localidade. Será o 25 de febreiro, en horario de 10.00 a 13.00 horas, coa praia da Corna como escenario. A xeira colectiva e participativa de limpeza forma parte das iniciativas de recuperación ambiental que impulsa todos os anos o Concello nos seus areais.
A este respecto, o concelleiro do Medio Ambiente, Xosé Lois Piñeiro, incide en que esta é unha mostra máis do compromiso da Administración local co medio ambiente a través de actividades de concienciación que impliquen a cidadanía no coidado das contornas naturais. O edil apunta que en 2023 se desenvolveron tres accións desta índole, as cales teñen continuidade neste ano.
O Concello da Pobra do Caramiñal proporcionará material necesario ás persoas voluntarias para efectuar a retirada manual de elementos nocivos para o ecosistema, ademais de contar coa colaboración da Protección Civil.
Poderán participar todas aquelas persoas maiores de idade que se inscriban no enderezo electrónico voluntariadopobradocaraminal@gmail.com. A data límite é no xoves 22 para a formalización do trámite.
