A noite do 23 ao 24 de xuño de 2024 pode que non sexa como a de anos anteriores. Haberá, si, lumeiradas; herbas de San Xoán, estralar de cachelas e festa rachada na maior parte de Galicia; máis pode faltar o esencial: a sardiña.
Pode.
Polo menos, é previsible que a súa presencia nesa festa maior, festa grande entre as grandes que é a noite de San Xoán, sexa unha simple representación (coma a mascletá do Manzanares en Madrid), e todo porque a campaña da sardiña -que comezará este ano a mediados de marzo para rematar o 30 de novembro- non se anuncia con boas perspectivas: a todas luces non vai ser una campaña de grandes avances para os pescadores de Galicia, que van ver como as cotas desta especie para España e Portugal serán reducidas este ano en base ao informe do Consello Internacional para a Exploración do Mar (ICES) nun 21,5%.
Deste xeito, os 240 cerqueiros do Cantábrico Noroeste (Galicia, Asturias, Cantabria e Euskadi) só poderán capturar 8.130 toneladas, case que a metade do que descargaran en 2.023: 17.730 toneladas.
De se cumprir esta proposta/previsión, o cupo na costa atlántica da península Ibérica para 2024 baixa das 56.600 toneladas de 2023 ás 44.450 do presente ano. A Portugal correspóndenlle 29.560 toneladas e a España (non se pode crer) 14.890.
A sardiña pilchardus minguou, segundo os datos científicos, como consecuencia dos escasos recrutamentos estimados polos científicos, situación que fai que a frota do Noroeste teña que, coma sempre, comprar excedentes a Portugal e Golfo de Cádiz.
Estes 240 cerqueiros do Cantábrico Noroeste recibirán 8.190 toneladas e 760 do Golfo de Cádiz, mentras que para as Rías Baixas van 406 toneladas.
O pasado ano consumíronse 22.200 toneladas, unhas 2.240 por riba das 218 que poderán capturar 77 barcos no Golfo de Cádiz e 244 no Cantábrico Noroeste. Estes últimos superaron o seu cupo conxunto en máis de 1.000 toneladas, incluidas parte das 340 toneladas que lles quedaban aos do sur no seu caso asignados e xestionados individualmente.
Polo de agora non hai datas para os tres meses de veda obrigada para España e Portugal. Pero cando se aplique a mesma, recurtarase -máis que probablemente- o período de vixencia da campaña.
A escaseza de futuro da sardiña como prato de festa maior en Galicia pon un negro pano para esa noite de meigas e trasnos que percorren os vieiros hoxe en día sen vagalumes nen rfecendo a sardiñas asadas na brasa.
