O Concello de Dodro tamén vai festexar ao grande o Día de Rosalía, non só pola dimensión cultural, humana, histórica e feminista da poeta galega, senón tamén pola importancia que tiveron as terras de Dodro para a obra da autora de Follas Novas. A celebración será este 23 de febreiro e, segundo informou a Área de Cultura do Concello, haberá música, poesía, cafés con verso e, por suposto, gastronomía (o imprescindíbel Caldo de Groria).
As actividades focalizaranse no Pazo de Lestrobe, a partir das 19.00 horas.
Contarase coa presenza de Iolanda Eiras e Narci Rodríguez, que achegarán a vertente musical do acto.
Ademais, os días seguintes á celebración (co 23 incluído) media ducia locais hostaleiros de Dodro (Casa Buela en Imo, Casa Pancho en Vigo, Bar Restaurante Xuncos en Imo, Bar da Silva en Tallós e Bar Caprichos en Lestrobe) ofrecerán á clientela un café con verso e un Caldo de Groria.
