A Fundación Europea para a Mellora das Condicións de Vida e de Traballo da UE (Eurofound) sinala que “os sentimentos de inseguridade en varios aspectos da vida da poboación europea están estendidos, mesmo entre as persoas que están materialmente acomodadas. Os responsables políticos deben ter en conta estas inseguridades para entender mellor as preocupacións e os descontentos da cidadanía”.
Este coñecemento pode contribuír de maneira positiva á elaboración de políticas sociais e laborais. A pesar de que, en xeral, mentres moitas persoas en Europa están a un nivel material relativamente acomodado en comparación con persoas doutras partes do mundo, os sentimentos de inseguridade poden representar un risco para a calidade de vida. Así son moitas as inseguridades: a inseguridade persoal; a inseguridade respecto á vivenda; a inseguridade respecto á asistencia sanitaria; a inseguridade laboral e a inseguridade respecto aos ingresos na vellez, entre outras.
No propio documento de reflexión da Comisión Europea tamén se sinala que o emprego pode protexer das inseguridades coa achega de ingresos e dunha mellor protección social, mediante, por exemplo, o seguro de desemprego, a acumulación da pensión, o seguro de accidente e o seguro de saúde, ademais dos dereitos sociais básicos que non dependen do emprego. Con todo, o Piar Europeo dos Dereitos Sociais recoñece que o emprego non sempre protexe contra a pobreza, e esixe aos responsábeis políticos que aborden este tema de maneira real e eficaz.
En relación ao caso da inseguridade respecto á vivenda, o Eurofound sinala que “os responsables políticos deberían prestar especial atención ás persoas no rango inferior da distribución de ingresos que viven en vivendas alugadas do mercado privado”.
