Os concellos do Baixo Ulla volveron xuntar forzas a prol da formación e do emprego. Esta semana, o alcalde de Dodro, Xabier Castro; a alcaldesa de Pontecesures, Maite Tocino; o alcalde de Rois, Ramón Tojo; o alcalde de Catoira, Xoán Xosé Castaño; o alcalde de Padrón, Anxo Arca e o concelleiro de Cultura e Xuventude de Valga, Pedro Calvo inauguración o Programa Integrado de Emprego (PIE) posto en marcha polos ditos concellos no salón de plenos do Consistorio de Pontecesures.
Segundo explicaron, trátase dun programa que ten por obxectivo mellorar a empregabilidade de persoas en situación de desemprego na zona. Ademais, destacaron que no PIE do Baixo Ulla ten unha especial relevancia a presenza da muller, 74 alumnas fronte a 26 homes; e a franxa de idade de maiores de 45 anos, que supera o 58% do alumnado.
O programa está moi enfocado á inserción laboral. Trátase de superar o 37% de ocupación ao remate do programa, unha cifra que se superou nas oito edicións anteriores e que o ano pasado chegou ao 40%. O PIE desenvolverase ata novembro de 2024.
