“O abuso dunha posición de confianza para a obtención dun beneficio deshonesto”, esta é a definición de corrupción. Desgraciadamente, a corrupción non ten unicamente unha natureza de carácter política senón que afecta tamén ao tecido empresarial, aos sindicatos, aos medios de comunicación e a boa parte da sociedade. O peor, é que a corrupción xera graves problemas sociais e morais.
Segundo algúns autores, o problema da corrupción é que sempre estivo aí, en España, porque hai unha cultura social moi corrupta e ademais o sector privado é cómplice da mesma, volvéndose cada vez máis sofisticada e globalizada.
Por outra banda, podería dicirse que a corrupción política non sería tal sen a complicidade, a participación activa e necesaria da corrupción empresarial, que leva a unha rede delituosa organizada de branqueo de capitais, sociedades pantasma, extorsións, subornos e un clientelismo endémico que leva mesmo ao financiamento de partidos políticos e diso, en Galicia, sabemos moito, e que continúa existindo unha espiral de corrupción e avaricia por enriquecerse desmedida.
A utilización de empresas para o financiamento de partidos ou formacións políticas e logo a obtención de favores políticos foi unha práctica moi habitual en Galicia, desde hai moito tempo. Tan normal parece que xa se considerou como algo habitual, tradicional e moi necesario para o financiamento irregular das campañas lectorais dalgúns partidos políticos.
