A Asociación Cultural e de Tradicións Mariñeiras A Gamela organiza o Entroido do Cabo da Cruz (Boiro), que se celebra este domingo 18 de febreiro e para o que contan coa colaboración do Concello. As actividades programadas darán comezo ás 12:00 h da mañá, coa saída da tradicional Matraquillada, dende a praza do Lorcho e que recorrera as rúas da parroquia.
Xa pola tarde, ás 17:00 h, na Capela do Carme terá lugar a obra teatral O Veloiro, que conta cun elenco “de primeira”, xa que, segundo lembran dende asociación cultural, “está formado polas máis ilustres personalidades do pobo de Cabo de Cruz”. A asociación recorda tamén que ás 19:00 h dará comezo o acompañamento do finado ata a praia da Ribeira Grande onde finalmente se lle prenderá lume ao Farruco. Todo isto amenizado con música, chocolate e unha filloada.
