Mes de febreiro, época de Entroido. E estas datas, ademais das tradicionais celebracións, traen consigo días non lectivos. Por iso, na aposta por favorece-la compatibilización da vida persoal e laboral das familias, a Concellaría da Igualdade da Pobra do Caramiñal activa o obradoiro de conciliación para os días 12, 13 e 14, no CEP Salustiano Rey Eiras, dende as 09.00 ata as 14.00 horas.
A concelleira da Igualdade, Estefanía Ramos, manifestou que se lles dá así continuidade ás distintas accións en materia de conciliación dirixidas a crianzas da infantil e da primaria para aquelas xornadas en que non teñen clase. Durante o acto de presentación e acompañada da axente da igualdade, Carolina Rodríguez, a edil aproveitou a ocasión para convidar á reflexión sobre o repartimento dos tempos e das tarefas “que afecta de forma moi diferente mulleres e homes e crea situacións de desigualdade.
Temos que supera-la idea de que a conciliación é unha cuestión das mulleres, e apostar pola corresponsabilidade como unha forma de mellora–lo benestar das familias e da sociedade en xeral.”
O prezo sitúase nos 9 euros por nena/neno, cun desconto do 50% á segunda irmá ou irmán e de balde para a/o terceira/o.
Ademais, as familias poderán optar aos servizos de Madruga e de Comedor, dos cales cómpre consulta-las condicións.
A inscrición pódese formalizar ata o día 8 de febreiro no Departamento da Igualdade, situado fronte á casa do concello.
Esta prestación en horario de mañá refórzase co Espazo de Coidados Corresponsables na quenda da tarde, o cal leva en funcionamento dende o inicio do curso nas xa referidas instalacións escolares, de luns a venres, de 16.00 a 21.00 horas. Trátase dun servizo municipal de balde suxeito a un mínimo de participantes.
Ámbalas propostas atópanse ao abeiro do Plan Corresponsables promovido e financiado con fondos procedentes do Ministerio da
Igualdade. Máis información no teléfono de contacto 981832764, marcando a opción 6, ou no enderezo electrónico igualdade@apobra.gal.
