María Outeiral, candidata número sete pola provincia da Coruña e representante do Barbanza, puxo de manifesto as necesidades que a comarca ten en canto a infraestruturas e servizos. A candidata fíxoo nunha comida en Lousame na que estivo acompañada de compañeiros e compañeiras da candidatura e das agrupacións socialistas da comarca.
Unha das principais demandas dos socialistas de Lousame é “a necesidade de solo industrial para a xeración de emprego” pois está proxectado, sinalaron, “pero non se tramitan os permisos necesarios para a súa habilitación”. Outeiral fixo saber que “a necesidade de superficie industrial é xeneralizada en toda a comarca, a Xunta de Galicia leva dez anos sen crear un so metro de terreo industrial, o que prexudica directamente á economía dos nosos concellos ao non poder instalarse novas empresas que favorezan o dinamismo económico do Barbanza”.
O mesmo pasa, dixo, cos servizos de dependencia e o centro de día de Lousame que conta cuns custes excesivamente elevados para a veciñanza da zona. “Os socialistas apostamos polos servizos e estes deben ser un servizo e non un beneficio. Non se pode consentir que a sanidade, a educación e a dependencia estean ao alcance dunhas minorías, teñen que ser universais para todos e todas”, recoñeceu María.
E outro das principais demandas e que tamén é xeneralizada na comarca é o problema do transporte público. “En concellos maioritariamente rurais como é o caso de Lousame, a veciñanza precisa dun transporte público que dea servizo ás principais necesidades como o médico ou o banco, e non podemos estar pendentes dun autobús que, se pasa, o fai unha vez ao día”, afirmou a candidata.
