A UCGAL (Unión de Consumidores de Galicia) emitiu un comunicado logo de coñecer a decisión do Executivo central de eliminar a aplicación do IVE ao aceite de oliva no marco das recentes negociacións entres distintos grupos parlamentarios, UCGAL considera “unha nova oportunidade perdida” a “insistente negativa do Goberno de España a aplicar medidas desta natureza a outros produtos básicos da cesta da compra como o peixe ou a carne”.
A organización considera que “coa decisión adoptada caen por si mesmos os argumentos esgrimidos desde o MAPA ou desde o Ministerio de Facenda xa que logo non se pode xustificar a medida sobre a base do aumento de prezos do aceite, xa que esta suba está sendo tamén moi significativa no caso de produtos do mar, os cales están a quedar fóra da cesta da compra de milleiros de familias que non poden permitirse o seu consumo debido ao elevado prezo”. UCGAL lembra que “preto do 70% dos galegos consideran que a rebaixa ou supresión do IVE podería incentivar o consumo de peixe, un produto básico na conformación dunha dieta equilibrada e saudable e cuxa calidade proteica está avalada polos máis recoñecidos profesionais da nutrición”.
UCGAL alerta tamén do “enorme risco” que para o sector e milleiros de familias que viven do mar están a ter distintas afirmacións ou noticias que alertan do perigo de consumo de peixe galego como consecuencia do episodio de vertido de pélets que afecta ás costas de distintas CC.AA, xa que “considera que no actual contexto europeo de seguridade alimentaria, nunca estes aglomerados plásticos chegarán ás nosas mesas”. A organización di que con este proceder fáiselle un fraco favor ao sector e a un produto cuxo consumo non deixa de decrecer en toda España e que “neste momento precisa de políticas de fomento do seu consumo e non de campañas de descrédito que contribúan a desbotar precisamente a implementación de medidas fiscais tan necesarias para favorecer o seu consumo”.
