A presentación ao vivo do esperado terceiro álbum de The Rapants xa ten data: a banda muradá dará a coñecer os temas que conforman La máquina del buen rollo o sábado 23 de marzo na Sala Capitol de Compostela. As entradas para a cita, que comezará ás 21.00 horas (apertura de portas ás 20.00h), estarán dispoñíbeis a partir das 12.00 horas deste venres, 2 de febreiro, a través da www.ataquilla.com.
The Rapants iniciou 2024 coa publicación de Blaster W4u, o primeiro avance das novas creacións que o grupo presentará ao vivo nos seus divertidos e talentosos directos, dos que deron boa conta o pasado verán nos principais eventos de Galicia co seu segundo LP, nomeado O corasón como un after e que inclúe temas como La favorita ou O avión.
