O pasado venres 19 de xaneiro celebrouse no Náutico do Freixo o foro final do proxecto Circular-Rur, que coordina dende hai dous anos o Concello de Outes xunto con AFIPRODEL Desenvolvemento Local e no que participan institucións e concellos de Irlanda, Italia, Croacia e Alemania.
Co proxecto búscase intercambiar boas prácticas para o desenvolvemento de iniciativas de economía circular no ámbito local e rural.
No foro final celebrado no Freixo achegáronse as conclusións finais da iniciativa e presentáronse varias propostas desenvolvidas polas entidades participantes. No que atinxe ao Concello de Outes, o Goberno local debullou casos de éxito como a Aula Sostíbel do Freixo (na que traballan a prol da inclusión entidades solidarias como MISELA ou ADISBISMUR, que empregan o inmóbel para dar unha segunda ou terceira vida aos plásticos recollidos nas praias ao tempo que poñen o foco no grave problema da contaminación mariña) ou o proxecto dun estaleiro local para dar novos aproveitamentos á madeira das bateas con vistas á creación de móbeis.
O rexedor Manuel González lembrou que a sesión do pasado 19 era a segunda das xeiras de traballo desenvolvidas en Outes ao abeiro do Circular-Rur, e que as visitas dos socios europeos “contribúen a visibilizar o concello en materia de innovación e sustentabilidade”.
A estadía dos socios en Outes incluíu unha visita á Aula Sostíbel e ao recentemente recuperado Estaleiro de Ciprián, hoxe en día museo da carpintaría de ribeira e espazo de dinamización.
Máis datos do proxecto
O proxecto europeo Circular.rur Novos modelos de negocio de economía Circular para a activación do rural europeo é un proxecto de asociación de cooperación en materia de formación profesional Erasmus+ que se desenvolveu dende o 01.11.2021 ata o 01.11.2023.
O consorcio do proxecto estivo liderado polo Concello de Outes e contou coa participación da Asociación de Profesionais de Desenvolvemento Local de Galicia, así como de socios europeos de Irlanda, Alemania, Italia, Croacia e Grecia: WIN Consultants Ltd, Meath County Council, Hamburgisches WeltWirtschaftsInstitut gemeinnützige GmbH, Comune di Capannori, Lokalna akcijska grupa Zagorje Sutla e Atlantis.
Os resultados de Circular.rur están dirixidos a profesionais da área de desenvolvemento rural e/o emprego.
O obxectivo principal consiste en “promover a transferencia de coñecementos innovadores sobre economía circular e o desenvolvemento de novos modelos de negocio baseados nesta, que respondan as expectativas dos mercados laborais nacionais e europeos, e que brinden novas oportunidades de activación fronte aos retos actuais, fomentando contornas rurais máis modernos e sustentábeis, a través do apoio intelixente da profesionais da área de desenvolvemento rural, aos futuros emprendedores do rural europeo”.
Toda a información sobre o proxecto está dispoñíbel na súa web, circularur.eu.
