O PSdeG-PSOE Provincial da Coruña presentou oficialmente ante a xunta electoral a súa lista para as vindeiras eleccións autonómicas na provincia. Estivo presente o secretario xeral provincial Bernardo Fernández Piñeiro, xunto aos e ás integrantes da candidatura.
Fernández Piñeiro destacou que a lista está composta por “compañeiros e compañeiras históricas desta formación e tamén por novas caras que entenden que o Partido Socialista é a única opción para garantir o futuro das galegas e dos galegos”.
O secretario xeral provincial aposta por “poñer en valor o que está facer Pedro Sánchez por Galicia dende o Goberno de España”. Pola contra, lembrou que “os intereses dos galegos e das galegas non se defenden indo nun autobús electoral por un rural onde hai tempo que non hai autobuses, cun condutor que leva moitos anos xestionando de xeito desastroso ese transporte metropolitano”, en referencia a Alfonso Rueda, engadindo que “ese intereses deféndense, por exemplo, votando a favor do incremento das pensións, que vai favorecer a máis de 800.000 pensionistas en Galicia, un cuarto da poboación”.
“Deféndense tamén”, continuou o socialista, “coa aprobación dos descontos e bonificacións da AP-9”. Destacou que “dende o PSdeG xa se está a traballar, con José Ramón Gómez Besteiro, que é presidente da Comisión de Transportes no Congreso, para lograr o obxectivo histórico da gratuidade total e absoluta desta autoestrada”.
En referencia á cuestión dos granulados plásticos que están a chegar ás nosas praias, Fernández Piñeiro denunciou que “o o PP está mentindo e difamando, aplicando o mesmo manual que xa aplicaron co Prestige, do que xa sabemos as consecuencias”. E engadiu: “O Goberno galego actúa tarde, mal e arrastrado pola presión social e dos medios de comunicación, instalado na confrontación constante e non na busca de solucións”, critica o socialista.
Por outra banda, a cabeza de lista, a independente Patricia Iglesias, quixo en primeiro lugar “dar as grazas aos compañeiros e compañeiras da familia socialista por acollerme neste partido, que coincide cos ideais que teño dende que teño uso de razón”. E engadiu: “Son unha muller progresista, letrada da Xunta de Galicia, con vocación de servizo público dende hai case 20 anos e me sinto plenamente identificada co proxecto progresista que lidera Besteiro”.
Julio Abalde, número 2 da candidatura e anterior reitor da UDC, explicou pola súa banda que “como vello militante do partido e unha vez finalizadas as miñas responsabilidades como reitor, é o momento de axudar ao Partido Socialista e, sobre, todo, axudar a Galicia a desenvolver o proxecto innovador e progresista que representa Besteiro”. E concluíu: “Galicia precisa ambición, ideas innovadoras, avanzar conxuntamente con toda a sociedade para lograr un futuro baseado no coñecemento, no talento, na innovación e na mellora continua”, sinalou o profesor e experto en microbioloxía.
