Na tarde deste martes 23 de xaneiro o equipo de Goberno de Ribeira mantivo reunións coa veciñanza da parroquia de Corrubedo e do lugar do Caramecheiro co propósito de buscar solucións aos asolagamentos producidos de xeito regular polas fortes precipitacións.
Na parroquia de Corrubedo, os representantes do Concello mantiveron unha xuntanza coa veciñanza da rúa Buenos Aires e na rúa Delicias, que nas últimas semanas viron afectadas varias propiedades debido ás inundacións. O equipo de Goberno expresou toda a súa consideración e achegou alternativas e solucións a este problema que “se ven repetindo de xeito sistemático ao longo dos anos e sen que os anteriores gobernos lle puxeran solución”, explicaron, engadindo que “é preciso levar a cabo actuacións de recollida das augas pluviais da zona das Brañas, os Pozos e tamén da rúa xeral”, explicou o alcalde Luís Pérez. Tamén fixo saber que “imos mellorar a conexión da recollida de augas pluviais na rúa Buenos Aires mediante a instalación de máis sumidoiros que permitan evacuar a auga dun xeito máis efectivo nos momentos de máximas precipitacións”.
Segundo explicou o rexedor, o Goberno local xa se puxo en contacto co xefe da Demarcación de Costas “para expresarlle a necesidade de acometer unha nova actuación na canalización da praia e con vistas a evacuar unha maior cantidade de auga, para o cal xa temos a autorización”.
O lugar do Caramecheiro, en Ribeira, tamén sufriu inundacións debido a que na canalización de augas pluviais na zona non hai os suficientes sumidoiros. Na reunión coa veciñanza, o Executivo de Ribeira comprometeuse tamén a acometer melloras nas conexións e servizos básicos para evitar estes asolagamentos que se producen polas fortes precipitacións.
