O Concello de Ribeira recibiu este mércores 3 de xaneiro á boxeadora Clara Millares, integrante do club El Canario. O pasado ano 2022, Clara Millares foi campioa galega de boxeo, e na modalidade de 60 quilos acadou o bronce nos campionatos de España Elite Feminino, ademais de obter a prata no nacional de clubs na categoría de 60 quilos. En 2023 volveu acadar o bronce no campionato de clubs de menos de 60 kgs e proclamouse campioa galega en menos de 63 quilos. Ademais, Clara adestra de xeito voluntario a un grupo de usuarios na disciplina de boxeo na Asociación Ambar.
Os membros do equipo de Goberno felicitaron á deportista polos éxitos acadados recentemente e por toda a súa traxectoria. O Concello agasallouna cunha peza de cerámica galega e cun bono de cen euros para gastar en tendas deportivas do municipio.
O alcalde destacou a “constancia e perseveranza de Clara para seguir acadando recoñecementos nun deporte no que, ademais, a preseza feminina é minoritaria”. Pola súa parte, o concelleiro de Deportes, Xabier Vidal, reafirmou o compromiso do Goberno co deporte de base e con tódalas entidades deportivas de Ribeira para a promoción do deporte na localidade.
