O Concello de Muros emitiu un comunicado no que mostra o seu total “compromiso e colaboración” co Gran Prix de Carrilanas e co Festival das Carrilanas de Esteiro. Este compromiso, segundo garante o Goberno local, desenvolverase exactamente igual que “como ata o de agora”. O comunicado vén a conto para clarificar a postura do Consistorio perante un conflito que lle é alleo e que se remonta a 2019, e no que están implicados, pero non na súa vertente pública, a concelleira de Cultura e o presidente do festival muradán Castelo Rock.
O Concello engade que as carrilanas de Esteiro “son unha Festa de Interese Turístico Nacional” e “unha prioridade para o grupo de Goberno local, cunha colaboración orzamentaria por parte do Concello que por suposto manterase e está garantida”. Dende o Consistorio lembran que “hai un proceso xudicial aberto e hai que respectalo”, en referencia ao devandito conflito.
A alcaldesa María Lago sinalou que “quero trasladar unha chamada á calma e o diálogo, xa que neste tipo de liortas ninguén gana”. A rexedora quixo facer público “de primeira man o posicionamento do grupo de Goberno para que quede claro”. E engadiu: “Debemos ter altura de miras e priorizar sempre o ben común, mantendo o respecto para todas as partes”, remata o grupo de Goberno local.
Por último, o Concello empraza aos organizadores das carrilanas a unha reunión para trasladarlles o apoio do Goberno local ao evento.
