O Concello de Boiro colabora este Nadal con Comprarcasa Miraben nunha recollida solidaria de xoguetes a favor de Cáritas Boiro. O alcalde, José Ramón Romero, participou esta mañá na entrega dos xoguetes xunto cos representantes da empresa, Fernando Casas e Leticia Domínguez, e a directora de Cáritas, Guadalupe Tubío.
Máis de 300 xoguetes foron os que se recolleron nesta campaña que comezou o día 1 de decembro e rematou este martes 2 co obxectivo de que ningún cativo quedase sen xoguete no Nadal. “Empezamos con pouquiños xoguetes e pouco a pouco fomos vendo que medraba e que máis persoas se animaban a doar os seus xoguetes”, afirmou Fernando Casas.
“Recollemos moitos puzzles, libros, xoguetes educativos… polo que quedamos moi satisfeitos co resultado e agardamos poder repetir a campaña en vindeiros anos”, afirmou Leticia Domínguez. O que se recolleron foron xoguetes novos e en bo estado que agora Cáritas vai clasificar para doar ás familias do municipio.
Arredor de 40 nenos e nenas son aos que chega esta campaña de recollida e que contarán cun xoguete novo este Nadal. “É unha sorpresa moi agradable a cantidade de xoguetes que se doaron e que permiten chegar a todas as familias, un broche á campaña de Nadal que comezou coa recollida de alimentos e produtos de primeira necesidade que nos permitiron atender as demandas neste Nadal”, recoñeceu Guadalupe Tubío de Cáritas Boiro.
O alcalde, José Ramón Romero, agradeceu a todas aquelas persoas que doaron o seu xoguete e deulle os parabéns á empresa pola iniciativa.
“O potencial das empresas de Boiro móstrase con accións sociais como esta, que van permitir que todos os nenos e nenas de Boiro teñan o seu xoguete no Nadal”, recoñeceu o alcalde.
