O mesmo “modus operandi”. Xa sucedeu coa catástrofe ecolóxica do Prestige, e logo caláronse bocas co diñeiro dos orzamentos xerais. “A Xunta de Galicia pide calma ante a vertedura de pellets e reclama máis información…”. Isto, despois de pasar máis de tres semanas do sinistro dun buque mercante, coa caída dunha parte da carga, prexudicial para o ecosistema mariño e o medio ambiente.
Galicia, volve vivir outra catástrofe natural, con posibles produtos tóxicos e unha clara contaminación do medio mariño, e os responsables da Xunta de Galicia, como noutras ocasións, mirando para outro lado e trasladando as culpas á empresa armadora, ao goberno do estado, aos concellos, aos ecoloxistas, en definitiva aos propios galegos.
Para o noso gobernante nunca pasa nada, logo encargaranse de destinar unhas importantes partidas económicas, ás organizacións pesqueiras, para tentar minorar os danos ocasionados. E, como sempre, a maioría desas organizacións pesqueiras e marisqueiras tragarán coa publicidade enganosa da Xunta.
A que máis esperamos para abrir os ollos e darnos conta de que seguimos sendo meras marionetas en mans do poder absoluto do gobernante pesqueiro da Xunta de Galicia?. Estamos a falar da nosa supervivencia, do noso medio de vida, da nosa contorna natural. Pois, seguir sendo estraños na nosa propia terra. Desde logo eu, non quero ser cómplice.
