Boiro vén de recibir unha serie de melloras nas súas instalacións eléctricas da man de UFD, a distribuidora eléctrica de Naturgy, que investiu 356.000 euros en varias actuacións e obras no municipio boirense (A Coruña). Deste xeito, a compañía instalou un novo centro de transformación na parroquia de Abanqueiro, substituíndo o existente tipo intemperie, construíu unha nova liña de media tensión subterránea para alimentar o centro de transformación da Praia de Mañóns e catro liñas de saída en baixa tensión. Asemade, desmontou un tramo de liña de media tensión aérea.
Engadir que UFD tamén construíu na Coviña unha nova liña de media tensión aérea de preto de 500 metros con orixe nun novo apoio onde se instalou un interruptor telecontrolado e final nun novo centro de transformación e a súa rede de baixa tensión asociada.
Dende a compañía inclúen cada ano no seu plan de investimentos actuacións e iniciativas para potenciar as infraestruturas de subministración de enerxía eléctrica e mellorar a rede de distribución eléctrica, especialmente en zonas rurais, contribuíndo así ao desenvolvemento económico destes territorios e á mellora das súas condicións de vida.
Para o delegado de UFD na provincia da Coruña, Emilio Castro, “o investimento realizado é unha proba máis do compromiso desta compañía co desenvolvemento enerxético de Boiro, xa que as actuacións realizadas aumentarán a capacidade da rede de distribución do municipio, ademais de mellorar a fiabilidade da subministración eléctrica e minimizar os tempos de resposta ante calquera incidencia no municipio.”
