Esta semana e a seguinte (as dúas primeiras semanas de xaneiro de 2024) son as últimas para a preselección do Programa Integrado de Emprego do Concello de RIbeira. As persoas interesadas poderanse achegar en horario de 8 a 14 ao Viveiro de Empresas. O requisito imprescindíbel para poder participar é estar dado de alta como demandante de emprego.
O Programa Integrado de Emprego (PIE) de Ribeira ten o obxectivo de mellorar a empregabilidade da cidadanía por medio de accións complementarias de orientación, formación e intermediación laboral.
As persoas interesadas poden adherirse ao programa en horario de 8 a 14 ou ben nos teléfonos 669150809/628557348.
“Este programa está dirixido a persoas con discapacidade, en risco de exclusión, mulleres vítimas de violencia de xénero, menores de 30 anos con baixa cualificación e persoas inmigrantes”, explicou recentemente a concelleira de Emprego, Veva Betanzos, engadindo que ao abeiro do programa levaranse a cabo formacións específicas e obradoiros para a busca de emprego, comunicación, habilidades sociais, preparación de entrevistas, emprendemento e mobilidade laboral. Entre as formacións, destacan cursos de inglés para o sector comercio, manipulador de alimentos, animación turística ou preparación e venda de peixe.
Segundo explicou o concelleiro de Servizos Sociais, Vicente Mariño, como medidas de conciliación “adaptaranse os horarios, combinando a orientación presencial coa telefónica e intentarase adecuar o horario ás necesidades das persoas participantes”.
