A asociación de tradicións mariñeiras A Gamela do Cabo da Cruz (Boiro) ven de conseguir unha axuda dos Grupos de Acción Costeira Local do sector Pesqueiro (os GALP) para desenvolver un proxecto de recuperación de memoria da parroquia do Castro, en Boiro. O proxecto de arquivo histórico, segundo informan os seus responsábeis, ten varias fases: dende a recollida de material gráfico e histórico do lugar (fotografías, documentos ou audiovisuais antigos) á gravación de testemuñas da memoria aínda viva nas persoas maiores.
Fontes da asociación explican que con todo este material elaborarase un arquivo histórico da parroquia que favorecerá diferentes “produtos”. Entre estes “produtos” figuran unha exposición de paneis permanentes ao aire libre nas inmediacións do porto antigo do Cabo da Cruz; unha web temática onde poder ver fotos, documentos e vídeos resultados do proxecto; publicacións en papel e soportes dixitais, redes sociais, etc.
A Gamela pretende con este proxecto “cumprir co obxectivo da asociación de recuperar e poñer en valor do patrimonio do lugar, comezando polas embarcacións tradicionais e a cultura marítima pero tamén, por suposto, no entorno social e cultural co que estas embarcacións están relacionadas”.
Neste intre está aberto o prazo de recollida de materiais e podemos contribuír a este proceso a través do teléfono 646 833 730 (Pablo) e do correo gamelacabodecruz@gmail.com.
