Proseguen en Outes as actividades culturais vencelladas a estas festas do remate do ano. Este venres 29 de decembro, ás 12:00 horas, celebrarase no auditorio da Casa da Cultura un concerto de Cantos e contos de nadal, interpretado polo trío formado por Uxía (voz e percusión), Sèrgio Tanus (guitarra, viola caipira, cavaquiño e percusión de man) e Santiago Cribeiro (acordeón).
Segundo informou a Área de Cultural do Concello de Outes que dirixe Anxo Nuñez, “o trío ofreceranos un concerto para público familiar con repertorio propio do Nadal”. E engadiu: “Con eles darán a coñecer panxoliñas tradicionais e outras de nova creación que os participantes poderán recordar e aprender para cantar despois na casa”.
A actividade encádrase na programación cultural do Concello Nadal en Outes.
