O Concello de Boiro convocou un proceso selectivo para a contratación dun/ha técnico/a de contratación na modalidade de funcionario/a de carreira correspondente á subescala técnica superior. O prazo de presentación de solicitudes para formar parte deste proceso está aberto dende este xoves 21 de decembro e por un período de vinte días hábiles.
Nas bases faise saber que as persoas candidatas deberán cumprir unha serie de requisitos como posuír o título universitario oficial de grao ou algún dos seus equivalentes; posuír a nacionalidade española ou outra que permita o acceso ao emprego público; ter cumpridos os dezaseis anos e non exceder a idade máxima de xubilación forzosa; non ter sido despedido mediante expediente disciplinario do servizo de ningunha administración pública e posuír as capacidades e aptitudes físicas e psíquicas para o desempeño das funcións ou tarefas.
O sistema de acceso será mediante concurso- oposición que consistirá na realización de dúas fases. A primeira delas, a fase de oposición, constará de tres exercicios: un cuestionario tipo test, resolución de dous supostos prácticos e a tradución duns textos galego-castelán. A segunda fase, o concurso de méritos, consistirá na valoración da titulación académica, a experiencia profesional, os cursos de formación e perfeccionamento e os cursos administrativos de lingua galega.
O prazo de inscrición é de vinte días hábiles a contar dende este xoves. As solicitudes deben presentarse no Rexistro Xeral ou na sede electrónica do Concello de Boiro. As bases do proceso e toda a información están dispoñíbeis na web municipal.
