O pasado domingo 3 de decembro celebrouse en Noia a sexta edición da Andaina Solidaria a prol da Asociación Misela, organizada polo Club Trabandainas coa colaboración do Concello, coincidindo coas celebracións do Día Internacional das Persoas con Discapacidade.
Dende o Club Trabandainas mostraron o seu agradecemento a todas as persoas que colaboraron (de diferentes maneiras) na organización da andaina e dende o Consistorio tamén tiveron palabras de agradecemento ao club pola súa “magnífica organización”, á rapazada de Asociación Misela polo seu bo humor, á Policía Local Noia, á Cruz Vermella Noia, e á AVPC pola súa colaboración, así como a todos os veciños e residentes que participaron na xeira deportiva de solidariedade e traballo integrador.
A andaina tamén contou coa axuda da Deputación da Coruña. A distancia a percorrer foi de 12 quilómetros, con dificultade media-baixa. A andaina tivo o seu punto de saída na Alameda, fronte ao Concello. O recadado grazas ás doazóns das persoas participantes irá dar á asociación local Misela, centrada na integración das persoas discapacitadas.
