A programación da Área de Cultura de Noia para este Nadal ven con actividades para tódolos públicos. A axenda, que xa se pode consultar enteira nas redes, estenderase até o mes de xaneiro. A programación terá un carácter marcadamente solidario: a cada evento celebrado no Coliseo ao que asistamos podemos levar un alimento non perecedoiro a favor de Cáritas e Cruz Vermella para axudar ás persoas e familias máis necesitadas. A axenda deu comezo a pasada fin de semana, co arrinque da III edición de Panxoliñas nas Parroquias e coa proxección de Lúa Vermella, no Noela, este sábado 2.
As actividades proseguen o 16 de decembro co filme Hasta el cielo, no Coliseo Noela a partir das 20.30 horas (entrada libre até completar o aforo), e continúan o venres 22, ás 18.00 horas, cun espectáculo de maxia e clown a cargo de Mago Noel (na rúa Carnicería e, en caso de mal tempo, no Coliseo Noela).
O sábado 23 de decembro Pitusa Semifusa achegará un concerto familiar na rúa Comercio (en caso de mal tempo no Noela) a partir das 18.00 horas.
O sábado 23 ás 20.30 horas está programado un Concerto de Nadal a cargo da Banda de Música de Noia. Será con entrada libre até completar aforo, no Coliseo Noela.
O sábado 23 a partir das 22h tamén está previsto un concerto de Jerry Noia Jukebox e DJ Pichi, na rúa do Curro. O domingo 24 recalará en Noia o Papá Noel, a quen se lle organizará unha recepción oficial (a partir das 17.00 horas na rúa do Curro e logo percorrendo o rueiro de Noia).
O xoves 28 proxectarase o filme infantil Canta 2, ás 18.30 horas no Coliseo Noela (con entrada libre).
O venres 29 de decembro, ás 17.30 horas, haberá unha sesión de contacontos e monicreques na praza da Constitución (no Noela en caso de mal tempo), a cargo de Lali Moreno.
Na mesma xornada do venres 29, tamén na praza da Constitución, Superpandi levará a cabo unha actividade de animación musical, a partir das 19.00 horas.
Ao día seguinte, sábado 30, a zona da Alameda acollerá ás 19.00 horas as Olimpiadas do Tibu (xogos para a rapazada).
O martes 2 de xaneiro ás 19 horas recalarán en Noia Pistacho e Carboncillo para achegar un espectáculo de circo na rúa do Curro, que será trasladado ao Noela en caso de mal tempo.
O mércores 3 de xaneiro proxectarase ás 18.30 horas a película infantil Os Buscamundos, no Coliseo Noela (con entrada libre).
O xoves 4 de xaneiro, a partir das 19h, Zancudos Elegantes achegarán un espectáculo itinerante nas rúas do centro histórico de Noia.
A maiores de todo o devandito, residentes e visitantes poden visitar até o 6 de xaneiro (dende este 6 de decembro) o Belén Animado da Igrexa de Santa María A Nova.
