Ata 40 e máis euros chegou a pagarse en mercados galegos o quilo de ameixa babosa nos días previos ao Nadal. A causa deste altísimo prezo non foi outra que a escaseza do produto, debida esta -segundo os técnicos dos pósitos- á enorme cantidade de auga acumulada nos parques de cultivo no pasado outono, época na que choveu como hai anos, moitos, non chovía.
Esta foi a circunstancia que matou a milleiros de exemplares de cría de berberecho e distintas especies de ameixa, nomeadamente babosa e xapónica, que foron as máis reclamadas -como o son a cotío- durante as pasadas festas de Nadal e, obviamente, o serán en Aninovo e Reis.
As perdas económicas son, para os mariscadores galegos, de grande trascendencia porque para eles a campaña marisqueira ten dous eixos básicos: o verán e as festas de Nadal, Aninovo e Reis. Todo o que non se faga econòmicamente nestas datas vai en prexuizo das mariscadoras e mariscadores, que deberán reanudar a semente sen ningún tipo de seguranza de acadar o tamaño comercial esixido para a venda dos bivalvos.
Queda unha mínima esperanza de resarcimento: que o Estado compense, mediante a declaración de zona catastrófica, o dano causado, dando deste xeito a Galicia o mesmo tratamento que se dera a outras comunidades autónomas en casos semellantes.
Os pasados días xa se formulou tal petición por parte da Consellería do Mar, e agora será a delegaciòn do Goberno en Galicia quen tramite a mesma para que o Estado recoñeza esa declararación de zona catastrófica nas rías tras a alta mortaldade do recurso por efecto dos temporais continuados, persistentes, na vertente atlántica galega.
Esa figura declarativa de “zona catastrófica”, utilizada por outras comunidades autónomas, como digo, ante situacións excepcionais semellantes, permite habilitar as axudas necesarias para compensar as importantes perdas económicas ocasionadas pola devandita mortaldade rexistrada nas poboacións de bivalvos.
A solicitude susténtase nos informes elaborados por Meteogalicia e o Intecmar, que certifican que as precipitacións na vertente atlántica entre o 15 de outubro e o 16 de novembro, superaron os mil litros por metro cadrado e o seu impacto na baixa salinidade nos bancos marisqueiros. Os danos orixinados por semellante acúmulo de choiva, están a ser avaliados polas confrarías de pescadores e os seus servizos tècnicos, e compre supor que as axudas solicitadas non van ser denegadas dada a evidencia de que os mencionados danos son debidos a circunstancias absolutamente naturais e imprevisibles.
