Non é Galicia a que, de xeito exclusivo, padece as consecuencias do mal tempo no eido do marisqueo; se aquí nos queixamos da baixa salinidade que rexistran as rías máis propicias para a produciónn de berberecho e ameixa, a conca de Archachon, en Francia, pasa estes días poo unha situación asimesmo problemática. Ata tal punto é así, que a prefectura de Gironda anunciou recentemente a prohibiciòn temporal da venda de ostras na devandita conca polos casos de intoxicación alimentaria colectiva rexistrados.
Ao parecer os síntomas son semellantes aos dunha gastroenterite aguda, se ben ata o de agora non se rexistrou ningún caso grave, segundo o informado por parte das autoridades. Están a se realizar pescudas sobre a trazabilidade, pero varios informes cadran en sinalar que as ostras da conca de Arcachon “están en dúbida” xa que logo as análises levadas a cabo en ostras cultivadas localmente confirmaron a presenza de “norovirus”.
Após a consulta coas organizacións sanitarias, a prefectura prohibiu temporalmente as actividades de extracción e comercialización destinadas ao consumo humano de todos os mariscos da conca de Arcachon, incluido o banco de Arguin.
Por este motivo, os lotes de marisco colleitados nestas zonas deben ser retirados da venda, pregándose ás persoas que teñen ese marisco non o consuman e procedan a devolvelo ao punto de venda.
A medida será suspendida en canto a calidade sanitaria do marisco sexa plenamente satisfactoria. Afecta principalmente aos ostricultores cuxa produción adornaría moitas mesas este domingo pola noite con motivo da Noitevella.
Os ostricultores declaran ser vítimas da saturación das redes de augas residuais e pluviais, o que provoca “desbordamentos no medio natural” que contaminan as zonas de produción.
Dous meses despois das tormentas que arrasaron varias hectáreas de criadoiros de ostras no banco de Arguin, os profesionais temen “unha crise económica sen precedentes” preguntándose -coma no caso de Galicia- “quen pagará a conta?”.
A produción de ostras na zona en cuestión rolda as 8.000 toneladas anuais, o 10% da produción nacional francesa.
En Galicia, como xa se informou en O Barbanza, a Consellería do Mar tramitou, a través da delegación do Goberno nesta comunidade autónoma, o recoñecemento de zona catastrófica os bancos marisqueiros afectados pola choiva rexistrada durante boa parte dos meses de outubro e novembro, que fixo que descendera a salinidade do mar nas rías provocando así unha alta mortaldade no marisco bivalvo.
