Cristina García Rey, responsábel dos plans provinciais da Deputación da Coruña, estivo este xoves 14 de decembro en Ribeira para, entre outras cousas, detallar o orzamento que a institución provincial asignou ao Barbanza-Muros-Noia: máis de 6,3 millóns na fase inicial do Plan Único, que inclúe o financiamento de obras e servizos públicos nos concellos. No que respecta a Ribeira, a contía será de 964.729,23€. O orzamento total para a provincia da Coruña é de 50.500.000. Ademais, salientou os 64.304.827,66€ investidos no Barbanza e na contorna de Muros e Noia nos últimos anos.
“O Plan Único da Deputación da Coruña (POS+)”, explicou a deputada, “serve para o financiamento de obras e servizos públicos de todos os concellos da provincia, que contribúan a mellorar o benestar dos seus cidadáns”.
No caso de Ribeira, o Plan Único permitiu financiar parte do gasto corrente (alumeados públicos, auga, parques e xardíns, persoal, etc.) e tamén algunhas obras como a renovación da liña de auga para consumo, a construción de parques cubertos no lugar da Ameixida, ou o saneamento de diferentes rúas, entre outras.
“O POS+ permítenos realizar investimentos non só no centro urbano de Ribeira, senón tamén dotar de servizos fundamentais a tódalas parroquias. A achega de servizos básicos é fundamental para mellorar a calidade de vida de toda a veciñanza e fomentar un desenvolvemento sustentábel. Grazas a estes fondos o Concello de Ribeira poderase desenvolver económica, social e culturalmente”, sinalou pola súa banda o rexedor ribeirense Luís Pérez, ao que engadiu a deputada: “Esta ferramenta serve, en definitiva, para que os concellos gañen en eficiencia na xestión do gasto, tomando as decisións pertinentes de acordo á súa realidade, e para que os veciños e veciñas gañen en benestar”.
Na presentación tamén estiveron presentes o tenente de alcalde Vicente Mariño e o segundo tenente de alcalde Francisco Suárez-Puerta.
